Il-Qorti Ewropea tal-Awdituri hija l-awditur estern tal-Unjoni.
Il-Kulleġġ tal-QEA huwa magħmul minn Membru wieħed minn kull Stat Membru u huwa appoġġat minn madwar 900 membru tal-persunal min-nazzjonalitajiet kollha tal-UE.
Il-missjoni tagħna
Aħna nwettqu awditi indipendenti, ta’ kwalità għolja u li jħallu
impatt biex intejbu l‑governanza, l‑obbligu ta’ rendikont,
it‑trasparenza u l-ġestjoni finanzjarja tajba tal‑azzjoni li
tittieħed mill‑UE, u b’hekk insaħħu l‑fiduċja taċ-ċittadini u
nikkontribwixxu b’mod effettiv lejn ir‑rispons għall‑isfidi
attwali u futuri li qed tħabbat wiċċha magħhom l‑UE.
Il-viżjoni tagħna
Aħna nsaħħu l‑fiduċja fl‑Unjoni billi nikkontribwixxu għal
governanza u reżiljenza mtejba.
Il‑valuri tagħna
Bħala l‑awditur estern tal‑Unjoni, inwettqu xogħolna b’konformità mal‑istandards internazzjonali tal‑awditjar u l‑valuri li ġejjin:
Indipendenza
Aħna nwettqu x‑xogħol tagħna mingħajr influwenzi li jikkompromettu, jew li jaf jitqiesu bħala li jikkompromettu l-ġudizzju professjonali tagħna.
Oġġettività
Aħna imparzjali u oġġettivi, u nibbażaw il‑konklużjonijiet tal‑awditjar tagħna fuq evidenza suffiċjenti u xierqa.
Mġiba etika
Aħna naġixxu b’integrità, onestà, u affidabbiltà, u unikament fl‑interess pubbliku tal‑UE, u l-għan tagħna huwa li mmexxu bl-eżempju fix‑xogħol professjonali tagħna u fil‑mod kif nimmaniġġjaw l‑istituzzjoni tagħna.
Trasparenza
Aħna nirrappurtaw dwar is‑sejbiet tal‑awditjar u l‑attivitajiet tagħna b’mod ċar, komprensiv u aċċessibbli, u b’appoġġ tal‑obbligu ta’ rendikont fil‑livelli kollha.
Professjonalità
Aħna niksbu, niżviluppaw u nżommu l‑ogħla livelli ta’ għarfien, għarfien espert u ħiliet b’rabta kemm mal‑professjoni tal‑awditjar tas‑settur pubbliku, kif ukoll mal-ġestjoni finanzjarja u tal‑politika tal‑UE.
